İpoteka və Kredit Zəmanət Fondunun satmaq öhdəliyi ilə kirayə mexanizmi çərçivəsində vətəndaşlara təklif edilən yaşayış sahələrinin siyahısına daha 223 tam təmirli mənzil əlavə edilib.
Fonddan Rahatemlak.az-a verilən məlumata görə Bakı şəhəri,Xətai rayonunda yerləşən yerləşən kompleksdə vətəndaşlara 36 mənzil təklif edilir.Mənzillər 1 və 2 otaqlıdır.
Abşeron rayonu,Xırdalan şəhəri, Bakı-Sumqayıt şossesində yerləşən kompleksdə 187 mənzil təklif olunur.Mənzillər 1,2 və 3 otaqlıdır.
Şəffaflığın və operativliyin təmin olunması məqsədilə vətəndaşların müraciətləri tam elektronlaşdırılıb. Sənədlər Fonda təqdim edildikdən sonra təcrübədə ən qısa vaxtda, 3 iş günü ərzində müraciətə baxılması, müvafiq qərarın qəbul edilməsi, kirayə müqaviləsinin rəsmiləşdirilməsi və mənzilin vətəndaşa təhvil verilməsi prosesi tamamlanır.
Yeni mənzillər Elektron ipoteka və kredit zəmanət sistemi (EİKZS) üzərindən seçim üçün 17 oktyabr 2022-ci il tarixindən açıq olacaq. Vətəndaşlar yaşayış kompleksləri üzrə təklif olunan mənzillərlə BU KEÇİD vasitəsilə tanış ola bilərlər.
Nəzərinizə çatdıraq ki,ötən ay Xətaidə və Xırdalan şəhəri,Bakı-Sumqayıt şossesində yerləşən komplekslərdə kirayə mexanizmi çərçivəsində 211 tam təmirli mənzil vətəndaşların seçiminə verilmişdi.Ümumilikdə isə indiyədək bu mexanimzdən 2491 ailə faydalanıb.
Kirayəçilərə dair tələblər, müraciətlərin qəbulu, onlara baxılması, yaşayış sahələrinin seçilməsi və rəsmiləşdirilməsi barədə ətraflı məlumatı Fondun internet səhifəsindən (www.mcgf.gov.az), “1549” Çağrı Mərkəzinə zəng etməklə, habelə EİKZS-dən istifadə ilə bağlı məlumatı EİKZS-də yerləşdirilmiş təlimatla tanış olmaqla əldə etmək mümkündür.